قدرت کا کرشمہ دیکھئے! واپسی کے دوران اچانک سمندر میں طوفان آجاتا ہے اور کشتی پر مسافر وں کو ڈوب جانے کا خطرہ لاحق ہو جاتا ہے۔ اسی بیچ جناب ابراہیم صاحب اللہ رب العالمین کے حضور یہ منت ونیت کر لیتے ہیں کہ اگر کشتی صحیح سلامت کنارہ پر پہنچ جائے تو ان شاء اللہ تلوجہ میں مدرسہ کی بنیاد ڈالوں گا۔ رب ِ کریم کی رحمت دیکھئے چونکہ ذاتِ واحد نے اس خطہ کو علم کا سرچشمہ بنانا تھا کہ کشتی بغیر کسی جانی مالی نقصان کے تمام مسافر وں کو بعافیت ساحلِ سمندر پر لے آجاتی ہے، گھر آکر جناب ابراہیم صاحب اسی منت ونیت کی تکمیل میں لگ جاتے ہیں۔

اسی نیت کے تحت 24 محرم الحرام 1389 ہجری بمطابق 11 اپریل 1969 عیسوی کو “دارالعلوم اسلامیہ عربیہ تلوجہ” کی بنیاد “داؤد عبدالغفور ٹرسٹ” کے تحت ڈالی گئی، جس کے اہتمام کی ذمہ داری حضرت اقدس مولانا عبدالحمید صاحب کو سونپی گئی۔ اس وقت چند طلبہ زیر تعلیم ہوئے، پھر یہ بیج آہستہ آہستہ تنا ور درخت بنتا گیا اور الحمد للہ اب ثمردار شجر بن گیا ہے، جس کی قیادت میں اب تک کثیر تداد میں مفتیان کرام، علماء عظام، قراء قرآن اور حفاظِ کلامُ اللہ بن کر آج صرف تلوجہ ہی نہیں بلکہ نوی ممبئی، ممبئی، کوکن اور ملک و بیرون میں اپنی دینی خدمات پیش کرتے ہوئے امت کی بے دینی کو ختم کرنے کی عظیم محنت کررہے ہیں۔